‘Çmenden’ kompanitë celulare, nga java tjetër rriten çmimet e ofertave

Tre operatorët celularë do të rrisin çmimet e paketave me parapagesë duke filluar nga muaji Shkurt.

Vodafone Albania dhe ALBtelecom në faqen e tyre zyrtare kanë publikuar njoftimet të cilat thonë se paketat 30-ditore me parapagesë do të pësojnë ndryshime.

Ndryshimet e reja për pajtimtarët e Vodafone Albania do të hyjnë në fuqi nga data 11 Shkurt ndërsa për ALBtelecom nga 30 Janari. Operatori tjetër, i dyti më i madh në treg, ende nuk ka lëshuar një njoftim zyrtar rreth ndryshimeve të paketave por me shumë gjasa do të ndjekë udhën e të operatorëve të tjerë.

Image result for albetelecom"

Si do të ndryshojnë paketat?


Vodafone Albania ofron aktualisht në treg pesë paketa standarde me minuta, SMS dhe MB: Vodafone Talk, Vodafone Combo, Vodafone Z, Vodafone Silver dhe Vodafone Gold. Gjithashtu ofron edhe tre paketa të tjera me njësi të cilat shërbejnë si min, SMS dhe MB: YouMix S, YouMix M dhe YouMix L.

Secila prej paketave do të pësojë një rritje çmimi prej 200 lekësh por ndryshime do të ketë edhe në njësitë e përftuara. Paketa bazë mbetet e pandryshuar ndërsa Combo, Z, Silver dhe Gold do të pësojnë rritje të njësive MB me 0.5 për paketën Combo dhe 1GB për katër paketat e tjera. Paketat me njësi mbetet të pandryshuara.

ALBtelecom gjithashtu ka rritur çmimin e paketave ekzistuese me 200 lekë. Tani e tutje operatori ofron paketat 900, 1300, 1500, 1500 Gigastike dhe 2100 lekë.

Image result for t mobile albania"

Në paketën 900 sasia e minutave, MB dhe SMS mbetet e pandryshuar. Paketa 1100 e bërë 1300 përmban 500MB më shumë internet, Paketa 1500 1GB më tepër, Paketa Gigastike 1GB më tepër dhe Paketa 2100 1GB më tepër.

Gjithashtu të dy operatorët bënë të ditur se vlera minimale e rimbushjeve pas afateve të lartpërmendura do të jenë 200 lekë.

Tregu i telefonisë celulare

Tre operatorët celularë në Shqipëri kanë shënuar rënie të ndjeshme të ardhurash dhe fitimesh në vitet e fundit ndërsa pajtimtarët po përdorin internetin në masë për të komunikuar përmes aplikacioneve si Facebook, WhatsApp dhe Instagram.

Image result for vodafone  albania"

Vitin e kaluar Vodafone Albania ishte i vetmi operator celular me fitim prej 700 milionë lekësh edhe pse shumë larg fitimeve në viteve të kaluara. Telekom Albania dhe ALBtelecom vijojnë me humbje.

Gjatë 2018-ës të ardhurat ishin në 26.8 miliardë lekë, 10% më pak sesa në 2017. Vitin e kaluar Vodafone Albania dhe Telekom Albania blenë frekuencat 800Mhz të cilat do të rrisin mbulimin dhe cilësinë e 4G sidomos në zonat rurale, tender i cili i kushtoi secilës kompani 7.44 milionë euro.

Sakaq ALBtelecom rinovoi për 15 vjet licencën 900/1800Mhz duke paguar 10.9 milionë euro. Vodafone është operatori më i madh në vend me 1.264 milionë pajtimtarë aktivë ndjekur nga Telekom Albania me 996 mijë dhe ALBtelecom me 446 mijë. /PCWorld Albanian